21 oct. 2022
Yon powèm chen mòde
tonbe rakle nan tè
san rete
1492
ouvè imajinasyon
byen laj
mezanmi
se ak laswè peyi fè nich
Ayiti bèl fanm
sèl peyi ki pran fil
nan van kò m
premye tablo
ki plante nan tè a
sann foli n ap pase
nan paswa
tonnè kraze m
syèl la fè chemizèt sou po m
ou abite nan chak mo
ki nan kò m
w a sonje van
ki te mennen w nan nich
pye doliv ou kimen yon
pil ti powèm choublak
anndan mwen
ou se sèl zwazo
ki pouse flè
mwen se sous dlo
anba rèv ou
tete w pire doulè m
vin jwenn
mwen rete byen rèd
tankou yon gwo letènite
anchène
m ap grenpe eskalye lenvizib
file monte anba limon rèv
pou m al respire
yon lòt vokabilè
kote moun ki t ap di
mwen pa t a ka lonje
gwo peyi nan zèb la
vin wè Etazini, Kanada, Lafrans
ak yon koudjay peyi aloufa
k ap manje listwa
memwa ak tout souverènte
vin wè yon kolonn peyi
k ap fè lago
k ap graje
souvni
ti lento ti lento ti lento
krazay zetwal pase
nan paswa kè m
nan mizik n ap naje a
pa etone w si w wè
solèy fas ba
lasalin
epitou
pou dat solèy
lanmò kouvri nou
poutèt nou chire 1804
nou mouche flèv Atibonit
poutèt tchovi se fil rèd
nan pye zansèt
yo devise kosmogoni nou
tan ki pa tan bave nan
konsyans nou
ou t a di
wout k ap mennen nou nan rasin
se powèm nan ki leve kanpe
ki di
Desalin Sen Solèy
Desalin se Solèy
Desalin se Lalin
Desalin se Lavi
Douglas Zamor, Laboulòk, Koleksyon Pyè Banbou, 2022.